O Concello de Barro presenta a IV Carreira Popular da Festa do Viño

O Concello de Barro e o Club de Atletismo +9 presentaron esta mañá a cuarta edición da Carreira Popular da Festa do Viño, que se celebrará o 7 de xuño. Trátase dunha proba que se consolida definitivamente no calendario deportivo galego e que continúa crecendo en participación e relevancia ano tras ano. Na presentación oficial, celebrada para dar a coñecer os detalles deste evento que se enmarca dentro da programación da Festa do Viño de Barro, estiveron presentes o alcalde de Barro, Xosé Manuel Fernández Abraldes; a concelleira de Deportes, Andrea Pérez; o concelleiro responsable da Festa do Viño, Iván Bello; e o presidente do Club de Atletismo +9, Abel Barros, quen estivo acompañado por outros membros do Club de Atletismo.

A carreira popular mantén a súa esencia inclusiva con categorías para todas as idades, desde os máis pequenos con percorridos curtos adaptados ata a proba absoluta de 10 quilómetros destinada aos adultos. Un dos aspectos que máis valoran os participantes edición tras edición é o excelente ambiente de convivio que se crea entre as atletas ao finalizar a competición, convertendo o esforzo deportivo nunha xornada de confraternidade integrada plenamente no espírito festivo da vila.

O alcalde Xosé Manuel Fernández Abraldes quixo agradecer a estreita colaboración do Club de Atletismo +9, sinalando que sen o seu traballo e implicación non sería posible acadar o nivel organizativo actual. O rexedor afirmou que o Concello de Barro mantén unha aposta decidida por esta proba como unha ferramenta fundamental para o fomento da actividade deportiva e dos hábitos de vida saudables entre a veciñanza, ao tempo que serve como escaparate para promocionar o patrimonio e a contorna natural do municipio a todos os visitantes que se achegan para participar.

As inscricións para esta cuarta edición abriranse oficialmente o vindeiro día 11 de maio. Todas as persoas interesadas en participar deberán tramitar a súa solicitude de forma telemática a través da páxina web de Galitiming (www.galitiming.com), onde tamén se poderá consultar o regulamento completo da proba. As prazas son limitadas, polo que desde a organización animan a todas as persoas afeccionadas ao atletismo a non agardar ao último momento para inscribirse.

Barro presenta o cartaz da XLVII Festa do Viño e inicia a conta atrás para a súa celebración máis importante

O alcalde de Barro, Xosé Manuel Fernández Abraldes, xunto co concelleiro responsable da Festa do Viño, Iván Bello Ferreiro, presentaron na mañá de hoxe o cartaz oficial da XLVII edición deste emblemático evento. Durante o acto, o rexedor amosouse moi satisfeito pola evolución da cita, destacando que estamos ante unhacelebración que vai medrando ano a ano grazas ao esforzo de todas as partes implicadas. Segundo explicou Abraldes, esta corenta e sete edición é o reflexo dun proxecto consolidado que cada vez atrae a máis xente e que pon en valor os viños de Barro, que cada vez son máis recoñecidos pola súa calidade.

Aínda que o Concello desvelará a programación completa nos vindeiros días, os responsables adiantaron que o cartel musical volverá contar coa presenza de orquestras e actuacións de primeiro nivel para asegurar que a festa siga nesa senda de crecemento. Con todo, o alcalde quixo facer especial fincapé en que o verdadeiro protagonismo desta celebración, unha vez máis, recaerá nos colectivos e na veciñanza de Barro, cuxa implicación e participación son os auténticos piares sobre os que se asenta o éxito desta gran cita anual. A este respecto, Fernández Abraldes salientou que, aínda que a programación será potente, a alma da festa é a súa xente, xa que sen o traballo asociativo e o ambiente único que crea a veciñanza, a festa non tería a vitalidade que amosa en cada edición.

Entre os atractivos desta nova edición non faltarán o prestixioso certame de viños da D.O. Rías Baixas e o xa tradicional concurso de viños caseiros, unha cita que pon en valor o esforzo dos pequenos produtores locais e que é parte fundamental da esencia de Barro. A axenda completarase con diversas probas deportivas, actuacións pensadas para todos os públicos e o esperado xantar tradicional veciñal, un momento clave para a convivencia e a confraternidade. O alcalde lembrou que a programación está pensada para ofrecer actividades de calidade para todos os públicos, xa que o que se busca e que todas as veciños e veciños poidan gozar deste evento.

Finalmente, unha das maiores expectativas desta edición céntrase na figura da persoa encargada de dar o pregón. Nos vindeiros días anunciarase a identidade dunha persoa veciña de Barro, moi querida por todos polo moito que ten feito en favor da veciñanza ao longo da súa traxectoria. Con moitos segredos aínda por desvelar, Barro quece motores para vivir unha Festa do Viño que volverá ser unha demostración de orgullo e dunha vitalidade veciñal que non deixa de aumentar.

Barro estreou a súa nova pista de pádel cun partido de exhibición

O Concello de Barro estrou este domingo a nova pista de pádel municipal situada no núcleo do Santo Antoniño. A instalación, situada na rúa do Pazo, inaugurouse oficialmente cun partido de exhibición a cargo de veciños e veciñas afeccionadas a este deporte que cada vez ten máis seguidores.

O alcalde de Barro, Xosé Manuel Fernández Abraldes, subliñou que esta instalación é un novo paso para completar a oferta deportiva e de lecer do municipio: “O noso obxectivo é que as veciñas e veciños de Barro teñan acceso a instalacións de calidade sen necesidade de desprazarse fóra do concello. Con esta pista de pádel gratuíta sumamos unha nova alternativa de lecer local que agardamos que teña moito uso e que axude a seguir fomentando a vida saudable e a convivencia no noso concello”.

A partir de hoxe, a pista quedará aberta baixo reserva para o uso de toda a veciñanza cun amplo horario para facilitar a conciliación e a práctica deportiva: estará operativa todos os días da semana, de luns a domingo, desde as 08:30 ata as 22:30 horas. Fiel ao seu obxectivo de promover o benestar da veciñanza, o Concello estableceu que a práctica de pádel nesta instalación sexa totalmente gratuíta.

Para garantir un uso organizado e xusto do espazo, será obrigatorio realizar unha reserva previa a través da páxina web oficial do concello (www.barro.gal). No momento da reserva, os usuarios e usuarias deberán aceptar as normas de uso da pista, velando así polo mantemento e o respecto por este novo ben público que vén enriquecer a oferta deportiva de Barro.

A nova pista sitúase na rúa do Pazo, nun espazo que foi obxecto dunha reordenación integral. Para a súa construción, os elementos de ximnasia e mobilidade para persoas maiores que alí se atopaban están sendo reparados e nos vindeiros días serán trasladados a unha zona sombreada próxima á nova tirolesa. Esta mellora permite crear un contorno deportivo máis accesible e agradable, facilitando o uso dos aparatos de ximnasia durante todo o ano baixo a copa das árbores.

Este proxecto, que foi executado pola empresa Urbatés S.L., supuxo un investimento total de 56.139 euros, no que tamén se incluíu a reforma dos vestiarios vellos do campo de fútbol de Outeiro. O financiamento deste proxecto municipal correu a cargo do Plan Extraordinario de Infraestruturas Deportivas da Deputación de Pontevedra 2025, unha aposta que permitiu ao Goberno local dotar ao municipio dun equipamento de lecer alternativo que fomenta a convivencia e a actividade física en todas as idades.

A concelleira de Deportes, Andrea Pérez, considera que con este proxecto “créase unha nova alternativa deportiva e de lecer en Barro, que agardamos que teña moito uso porque o pádel é un deporte que cada vez ten máis participantes e que é resulta moi atractivo para quen o practica porque cun par de días probando xa se pode acadar o nivel suficiente para desfrutralo”.

Convenio de colaboración entre o concello e o Barro CF

O Concello de Barro e o Barro C.F. consolidan un ano máis o seu compromiso co deporte local. O alcalde, Fernández Abraldes, e o presidente do club, José Sanmartín, formalizaron a renovación do convenio de colaboración nun acto que contou coa participación da concelleira de Deportes, Andrea Pérez Cal, e de representantes da directiva da entidade deportiva local.

Este acordo supón unha achega municipal de 8.000 euros destinada a garantir que as/os cativas/os e mozas/os de Barro que o desexen conten con todas as facilidades para a práctica do fútbol.

Grazas a esta contribución do concello, o Barro C.F. poderá seguir impulsando a formación en fútbol e fútbol sala, promovendo a participación de nenas e nenos, fomentando o compañeirismo, o traballo en equipo e a vida saudable desde a base.

Fin ao confinamento das aves en Barro

Tras catro meses de restricións por mor da gripe aviaria, as galiñas do noso concello xa poden volver saír ao exterior con normalidade. O Ministerio de Agricultura autorizou hoxe o levantamento do confinamento xeral grazas á boa evolución sanitaria.

Malia o alivio en Barro, a prudencia mantense en 40 municipios galegos que seguen en zonas de risco ou vixilancia. Localidades veciñas como Pontevedra, Poio, Vilagarcía, Meis ou Ribadumia aínda deberán manter as súas aves baixo teito ata novo aviso.

Evitemos o peche da EEI de Curro

A escola unitaria de Curro está en risco de peche por falta de matrículas para o vindeiro curso.

 Só faltan por cubrir dúas prazas para mantela aberta. Se non se consegue, a Xunta procederá ao peche do centro.

A EEI de Curro ofrece un ensino público de calidade, con grupos reducidos e unha atención próxima, personalizada e adaptada ás necesidades de cada neno e nena.

Manter esta escola é garantir un servizo esencial para as familias e defender o futuro do noso rural.

 O prazo de prematrícula remata o luns 23 de marzo

 Para máis información: 630 32 83 40

Mellora dos accesos ao lugar de Constenla

A Xunta de Goberno local vén de aprobar un proxecto para mellorar os accesos ao lugar de Constenla, na parroquia de Barro, unha actuación que permitirá reforzar a seguridade viaria e facilitar o acceso rodado ao núcleo.

🏗️ As obras permitirán renovar a capa de rodadura ao longo de arredor de 700 metros, desde Constenla ata o enlace coa estrada da Deputación en Chan de Santos. O proxecto tamén inclúe actuacións para a recollida e canalización das augas pluviais, mellorando a drenaxe e contribuíndo á conservación da vía.

O alcalde, Xosé Manuel Fernández Abraldes, e o concelleiro de Medio Rural, Obras de Accesos a núcleos, Seguridade Viaria e Humanizacións, Iván Bello Ferreiro, visitaron a zona onde se desenvolverán os traballos, unha actuación que responde ás demandas da veciñanza e permitirá seguir mellorando os accesos aos distintos núcleos das parroquias.

O investimento total ascende a 56.766,94 euros, dos que o Concello de Barro achega 9.852,11 e a Xunta financia 46.914,82, a través do programa de axudas para actuacións en camiños rurais no período 2026-2027, cofinanciado co Fondo Europeo Agrícola de Desenvolvemento Rural (Feader) no marco do Plan Estratéxico da PAC 2023-2027.

Traballo conxunto pola prevención das condutas adictivas

💬 Onte tivo lugar unha xuntanza dos alcaldes de Barro, Cuntis, Moraña e Portas co obxectivo de reforzar a coordinación e o traballo conxunto no desenvolvemento do Proxecto de Prevención das Condutas Adictivas no Eido Local.

🤝 Durante a reunión fíxose balance das accións desenvoltas ao longo de 2025 nos ámbitos escolar, familiar, xuvenil e comunitario, analizouse a situación actual das condutas adictivas e consolidouse a aposta firme dos catro concellos pola prevención, tanto das adiccións con substancia como sen ela.

🧠 As condutas adictivas continúan a ser un dos grandes retos da nosa sociedade, polo seu impacto na saúde e no benestar das persoas. Por iso, os concellos de Barro, Cuntis, Moraña e Portas renovan o seu compromiso de seguir traballando unidos, convencidos de que a prevención é a ferramenta máis eficaz para reducir a incidencia, a mortalidade, a morbilidade e os problemas psicosociais asociados.

🏛️ Este labor desenvólvese a través do Convenio de colaboración para o período 2025-2028, contando coa colaboración da Consellería de Sanidade

𝗕𝗔𝗡𝗗𝗢 | Limpeza de parcelas e prevención de incendios

Coa chegada da época de maior risco de incendios forestais, lémbrase a todas as persoas propietarias de parcelas e terreos da obriga de manter correctamente xestionada a biomasa vexetal, segundo a Lei 3/2007.

É fundamental manter as fincas limpas de maleza e vexetación combustible, así como respectar as distancias de seguridade arredor de vivendas, edificacións e vías públicas.

🗓 As parcelas deberán estar en condicións axeitadas, como mínimo, antes do 31 de maio.

Entre todas e todos podemos previr os incendios e protexer as nosas vivendas e o noso entorno.

📞 Para calquera dúbida ou máis información, podedes contactar cos servizos municipais do Concello de Barro.