🎭 O concelleiro de Cultura, Adrián Silva, mantivo unha reunión coas integrantes do grupo de teatro xurdido da actividade municipal Laboratorio de Teatro.
Este grupo naceu grazas a unha iniciativa impulsada polo Concello, e ao longo deste tempo ten desenvolvido un excelente traballo, demostrando talento, compromiso e unha gran paixón polas artes escénicas.
Agora queren dar un paso máis: constituírse como asociación para consolidar o proxecto e garantir a súa continuidade no tempo.
Adrián Silva manifestoullo o apoio go goberno municipal a esta nova etapa e comprometeuse a seguir colaborando para que poidan continuar desenvolvendo o seu traballo e a súa afección. Nos vindeiros meses retomarán a actividade para preparar unha nova obra de teatro, que contará co respaldo municipal.
O Concello de Barro presentou a programación do Entroido 2026, unha proposta coa que se busca reforzar esta celebración no municipio apostando pola participación e implicación veciñal.
A programación dará comezo o domingo 15 de febreiro coa celebración da Corrida do Galo, unha actividade que se desenvolve en formato de semifinais nas distintas parroquias do concello. Ao longo da xornada haberá probas nas seis parroquias con diferentes horarios e localizacións. A Corrida do Galo é unha tradición local que o concello de Barro recuperou, e na que calquera veciño ou veciña pode participar. Esta tradición suma cada ano novos participantes de todas as idades.
Ese mesmo día, ás 18.00 horas no Centro Cívico, terá lugar tamén o concurso de filloas e orellas, no que as veciñas e veciños de Barro afeccionados á repostería tradicional poderán pór a proba o seu talento. O xurado está composto por profesionais da hostalaría e repostería locais.
A programación continuará o 22 de febreiro co Festival de Entroido, que se celebrará a partir das 17.00 horas no pavillón municipal. Durante esta xornada terá lugar a final da Corrida do Galo, o concurso de disfraces e a presentación do Corvo de Coralia, figura simbólica do Entroido de Barro.
O peche da programación chegará o 8 de marzo coa celebración do V Festival de Murgas, ás 19.00 horas na Nave da Música, xornada na que terá lugar a tradicional despedida e queima do Corvo de Coralia, poñendo o broche final ao Entroido 2026.
A programación foi presentada nun acto no que participaron o alcalde de Barro, Xosé Manuel Fernández Abraldes, o concelleiro de Cultura, Adrián Silva, e Tito Landín, veciño do concello e persoa encargada de elaborar o Corvo de Coralia, unha figura que se presenta durante o Festival de Entroido e se queima o último día da programación como símbolo de despedida da festa.
Desde o Concello de Barro animan á veciñanza a tomar nota das datas, preparar os disfraces e participar nas actividades, contribuíndo así a dar continuidade e forza a unha celebración que se quere seguir potenciando nos vindeiros anos.
Axudas para renovar e mellorar o sistema de depuración de augas residuais en vivendas unifamiliares
Augas de Galicia convoca axudas para a substitución de sistemas antigos de tratamento de augas residuais por fosas sépticas ou sistemas de depuración máis eficientes, destinadas a vivendas unifamiliares.
Ata o 100 % do investimento, cun máximo de 4.000 € por vivenda.
Prazo de solicitude: do 16 de febreiro ao 16 de marzo de 2026.
Dirixidas a vivendas unifamiliares sen acceso á rede municipal de saneamento.
O Entroido xa está en marcha en Barro e neste 2026 o concello volverá encherse de cor, humor e tradición cunha programación pensada para todas as idades.
A programación dará comezo o 15 de febreiro e desenvolverase ao longo das semanas seguintes con diferentes actividades vencelladas ao Entroido, entre as que se atopan a tradicional corrida do galo, diversos concursos, o festival de Entroido, o festival de murgas e os actos arredor do noso rei do Entroido, o Corvo de Coralia, que marcará o inicio e o peche desta edición.
👉 Desde o Concello animamos a toda a veciñanza a ir anotando as datas, preparar os disfraces e afinar a retranca para gozar dun Entroido de Barro 2026 cheo de festa e participación.
📌 Nos vindeiros días irase publicando información máis detallada sobre cada actividade, así como as bases dos diferentes concursos e eventos.
O alcalde, Xosé Manuel Fernández Abaraldes, fixo entrega dunha placa de agradecemento a Alberto Méndez Abal, con motivo da súa xubilación tras máis de tres décadas de traballo no Concello de Barro.
Alberto iniciou a súa andaina no ano 1986, desenvolvendo boa parte do seu labor no CEIP Amor Ruibal, onde conviviu con moitas xeracións de nenos e nenas, deixando unha fonda pegada pola súa proximidade e complicidade.
O alcalde expresoulle no nome da veciñanza de Barro o agradecemento polos seus anos de servizo á veciñanza e desexoulle todo o mellor nesta nova etapa da súa vida.
O Concello de Barro vén de aprobar en Xunta de Goberno o proxecto para a construción dun circuíto de pumptrack, cun investimento de 96.000 euros, que se financiará con cargo ao Plan extraordinario de infraestruturas deportivas da Deputación de Pontevedra.
A nova instalación executarase no lugar do Outeiro, na parcela anexa á piscina municipal, ampliando así a oferta de instalacións deportivas e de lecer do concello e creando un novo espazo ao aire libre para a práctica deportiva e o encontro veciñal.
O alcalde de Barro, Xosé Manuel Fernández Abraldes, e a concelleira de Deportes, Andrea Pérez Cal, visitaron recentemente a parcela na que se levarán a cabo os traballos, comprobando in situ a localización e as posibilidades que ofrece este novo equipamento para o municipio.
O pumptrack é unha pista deportiva composta por curvas, lombas e peraltes que permite a súa utilización con bicicletas, patinetes, monopatíns ou skates. Trátase dun espazo pensado para persoas de todas as idades, mais especialmente para as nenas e nenos e a a mocidade do municipio.
Con esta actuación, o Concello de Barro continúa a apostar polo fomento da actividade física, a práctica de novos deportes e a promoción de hábitos de vida saudables, dotando á veciñanza dun novo espazo de lecer e deporte accesible e integrado no entorno municipal.
Este martes 23 de decembro, ás 20.00 horas, o Pazo acolle o espectáculo “Molto Barroco”, da compañía Píscore, unha proposta chea de humor, música e teatralidade para todos os públicos.
Pazo de Barro
23 de decembro
20.00 horas
Financiado con cargo ao Plan +Escénicas da Deputación de Pontevedra
O Concello de Barro vén de presentar a programación do Nadal, unha proposta que volverá transformar o Pazo da Crega no corazón das festas e que se desenvolverá entre o 19 de decembro e o 5 de xaneiro. Un ano máis, o espazo contará cunha ambientación especial que converterá o Pazo nun lugar de encontro, celebración e convivencia para persoas de todas as idades.
A apertura oficial terá lugar o día 19 coa iluminación do Pazo, un dos momentos máis significativos do Nadal en Barro, e coa visita de Papá Noel para recibir as cartas das crianzas. A xornada completarase coa actuación de Peter Punk e cunha chocolatada que dará o pistoletazo de saída á programación festiva.
Nos días seguintes desenvolveranse propostas moi diversas, que van desde a audición do alumnado da Escola de Música ao trineo de Papá Noel que percorrerá Barro, pasando pola visita do Apalpador ou unha viaxe polas tradicións galegas do Nadal conducida por Lidia Mariño, que culminará co acendido do tizón, unha tradición recuperada nos últimos anos e moi ben acollida pola veciñanza.
O Nadal continuará con espectáculos e actividades culturais dirixidas a públicos de diferentes idades: a música en clave humorística de “Molto Barroco”, da compañía Píscore; o concerto da Coral Polifónica de Barro e das pandeireteiras de Peñaflor; a maxia de David Maestro; o Mercado de Nadal diante do Centro Cívico; ou a proxección de cine familiar con “MUFASA”. Tamén participarán os coros parroquiais, o grupo de acordeóns Rías Baixas e a compañía Chafallas, que ofrecerá teatro infantil na recta final de decembro.
A isto súmanse os obradoiros Nadal en Verde, tres mañás de actividades gratuítas dirixidas a nenas e nenos de 6 a 12 anos, que contribuirán a manter o Pazo como espazo de aprendizaxe e convivencia durante as vacacións escolares.
O 31 de decembro volverán celebrarse as Badaladas Miúdas, que permiten ás crianzas vivir o seu propio fin de ano en horario de mañá. Xa na madrugada do día 1 de xaneiro terá lugar unha festa diante do Centro Cívico para dar a benvida ao 2026. As primeiras datas do novo ano estarán marcadas pola música e a cultura, cun baile de aninovo con Ana Angueira, un recital de zanfonas e voz a cargo de Suso Vaamonde na Capela do Pazo e a posta en escena de “O Quebranoces”, interpretado polo Ballet de Galicia e a Banda de Música Xuvenil de Barro.
O programa pecharase o 5 de xaneiro coa tradicional Cabalgata de Reis. As Súas Maxestades recibirán ás crianzas no Pazo da Crega, acompañadas polo Grupo de Danzas Amor Ruibal, antes de percorrer en comitiva o traxecto ata a Nave da Música. Alí celebrarase unha festa con música de DJ MOE e unha merenda de chocolate con rosca que poñerá fin a varias semanas de intensa actividade cultural e festiva.
Ata o 100 % do investimento, cun máximo de 4.000 € por vivenda.
Prazo de solicitude: do 16 de febreiro ao 16 de marzo de 2026.
Dirixidas a vivendas unifamiliares sen acceso á rede municipal de saneamento.
Máis información no DOG:
Grazas, Alberto!
Pazo de Barro
23 de decembro
20.00 horas
Financiado con cargo ao Plan +Escénicas da Deputación de Pontevedra
