Club de lectura”UN OLLO DE VIDRO”

Lectura mes de agosto: Comerás flores, de Lucía Solla Sobral.
RECOLLIDA NA BIBLIOTECA O XOVES 13 DE AGOSTO.
Comerás flores é a primeira novela da autora Lucía Solla Sobral (Marín, 1989), unha voz nova no panorama literario actual. A obra converteuse nun auténtico fenómeno editorial grazas ao boca a boca dos lectores, destacando tanto pola súa intensidade emocional como pola súa capacidade de interpelar ao público.
A novela foi recoñecida con importantes galardóns, entre eles o Premio El Ojo Crítico de Narrativa 2025 de RNE e o Premio Cálamo 2025 ao Libro do Ano, ademais de figurar en múltiples listas dos mellores libros do ano en distintos medios. Estes recoñecementos confirman o impacto desta obra, que agardamos que disfruten os participantes do club de lectura.
REUNIÓN

Próxima reunión do club de lectura 17 DE SETEMBRO, ás 19:30, na Biblioteca P.M de Barro.

DÍA DO LIBRO 2026. BIBLIOTECA DE BARRO.

 A banda deseñada toma a Biblioteca de Barro! 


Na biblioteca de Barro, a lectura e a cultura medran tamén ao ritmo da banda deseñada, que nos aprende a mirar o mundo doutro xeito.
Neste curso académico, o proxecto lector do CEIP Amor Ruibal está centrado na banda deseñada, un xénero que combina linguaxe visual e textual e que resulta especialmente motivador. Así mesmo, no IES de Barro existe un club de lectura de cómics, o que evidencia o interese crecente deste formato entre a mocidade.
Para acompañar estas iniciativas, cómpre lembrar que a nosa biblioteca conta xa cunha sección específica de banda deseñada, que se verá reforzada cunha mostra de exemplares representativos do fondo bibliográfico existente.
Ademais, este ano realizouse a adquisición dun novo lote de cómics, co obxectivo de ampliar e actualizar a colección e seguir enriquecendo os recursos dispoñibles para a veciñanza.


Co fin de dar resposta a estas propostas, celebrar o Día do libro e fomentar a coordinación entre etapas educativas e a biblioteca pública, o Concello de Barro organiza unha exposición temática no salón de actos da biblioteca, coincidindo coa celebración do Día do Libro.
-A exposición permanecerá aberta ata o 20 de maio.
-As visitas do alumnado do CEIP e do IES desenvolveranse ao longo de tres semanas, a partir do día 20 de abril.
-Como actividade destacada, contaremos cunha visita guiada con Kiko da Silva o día 24, que achegará ao alumnado ao proceso creativo da banda deseñada.
Unha oportunidade para achegarse ao mundo da Banda Deseñada, descubrir novos títulos e seguir medrando como lectores e lectoras.

Faladoiro co escritor Xesús Fraga.

O Club de Lectura “Un ollo de vidro” continúa a súa andaina nesta tempada cunha nova lectura que promete reflexión e conversa: “Virtudes (e misterios)”, de Xesús Fraga.
Nesta obra, o autor conta a emigración desde a parte dos retornados. Esta novela é, sobre todo, o relato dunha epopea como a que protagonizaron tantas mulleres galegas que, levadas pola adversidade, rematan percorrendo o mundo á procura dun futuro mellor.
Unha obra que ten moitas lecturas e moitos vieiros, polos que o autor nos leva coma se fosen as liñas do metro de Londres, a cidade ao redor da que gravitan os personaxes da novela. É, tamén, a historia dun neto asombrado e dunha avoa poderosa. A historia dos que marchan e que, cando regresan, nin eles son os mesmos nin a terra que deixaron é a mesma.
E despois da lectura, o mellor está por vir: o club terá a oportunidade de conversar co propio Xesús Fraga, o día 27 de novembro ás 19:30 na biblioteca, que compartirá connosco detalles sobre o proceso de escritura e o significado persoal que encerra esta novela premiada co Premio Nacional de Narrativa.
Será unha ocasión perfecta para coñecer de primeira man ao autor, facerlle preguntas e intercambiar impresións sobre unha obra que non deixa indiferente a ninguén.