Remataron os traballos de adecuación, mellora e posta en valor da capela do San Marco, capela que é propiedade do Concello e que está dentro dos terreos do Pazo da Crega.
Con esta última intervención realizouse a renovación da instalación eléctrica, elimináronse as filtracións de auga das paredes e realizouse un minucioso traballo de limpeza da pedra.
O importe total deste proxecto ascendeu a 24.123,12 euros, dos cales foron sufradas a cargo dunha subvención da Deputación Pontevedra para melloras do patrimonio un total de 11.655,94 euros.
Remataron os traballos de reparación, limpeza, acondicionamento e posta en valor da fonte e do lavadoiro do lugar de Mane de Arriba, na parroquia de Barro. O obxectivo era a recuperación e o adecentamento tanto do lavadoiro como do seu entorno.
Esta obra foi executada pola empresa Transportes e Canteria Antonio S.L., dentro do proxecto de ampliación de viais e de accesos ao lugar de Mane de Arriba.
Nos vindeiros meses iniciarán os traballos de pavimentación no lugar.
Desde o Concello de Barro séguese apostando, un ano máis, pola promoción da saúde e a prevención das condutas aditivas. É por iso que, dentro do Proxecto de prevención das condutas aditivas de Barro, ao longo deste 2º trimestre escolar acábanse de realizar varios Obradoiros de prevención destinados ao alumnado da E.S.O do IES de Barro; a través dos cales se pretendeu reforzar factores de protección entre a nosa xuventude (autoestima, xestión emocional, habilidades sociais, xestión da presión grupal, mitos e riscos das drogas, e uso saudable e responsable das TIC), que reducirán a probabilidade de que desenvolvan unha futura conduta aditiva.
Moitos parabéns a Don Ramón “O Asturiano”, que acaba de cumprir nada máis e nada menos que 101 anos gozando dunha extraordinaria lucidez e con moita memoria.
Oxalá poida seguir sumando moitos máis gozando de boa saúde e rodeado da súa familia.
