O Corvo de Coralia é a figura central sobre a que xira o Entroido de Barro. O Corvo de Coralia é un personaxe inspirado nun corvo real que habitou Barro a mediados do século XX e que tiña o don da palabra.

O corvo sabía falar porque lle ensinara a súa dona Coralia e este aproveitaba ese don para burlarse das galiñas. Imitando a Coralia, subía encima dun alto e chamaba polas pitas de igual maneira que Coralia as chamaba para lles dar de comer: “churras, churras, churras” e estas, pensando que era a súa dona para lles dar o almorzo acudían á cita, mais ao chegar reparaban en que quen as esperaba era o corvo e que non lles tiña nada que ofrecer e entón o corvo dedicáballe unha gargallada: “ha, ha, ha”.

Ese espírito burlón do corvo quixo recuperalo o concello de Barro e usalo como imaxe do Entroido local.