Co obxectivo de estudar e analizar a situación na que se atopa a rede de saneamento actual do concello de Barro, contratouse un estudo exhaustivo da rede de canalizacións e colectores existentes para identificar aqueles que puideran presentar algún tipo de problemas relacionados con infiltracións ou que puideran presentaran eivas no seu funcionamento.

As infiltracións que foron identificadas grazas a este estudo están relacionadas coa entrada na rede de saneamento de augas pluviais ou de augas relacionadas con fontes ou mananciais que entran na rede. A entrada desta auga, maioritariamente de orixe pluvial, na rede de saneamento provoca que aumente o caudal e que baixe a eficacia dos tratamentos de depuración.

A identificación da entrada destas augas limpas na rede de saneamento é unha prioridade para poder acometer as obras necesarias para a súa separación, por iso este documento é fundamental para priorizar os traballos de mellora da rede existente.

Esta auditoría sacouse a contratación por un importe de 18.029 euros e financiouse con cargo a unha subvención da Xunta de Galiza de 14.423 euros dentro da liña de subvencións para auditorías da rede de saneamento para a detección de infiltracións que se convocaron para este 2024. A empresa que se encargou da execución destes traballos foi Cuarta Zona Ingeniería S.L.

Un ano máis, inícianse en Barro os Obradoiros de prevención das condutas aditivas do ámbito escolar. Estes Obradoiros realizaranse dentro do Proxecto de prevención das condutas aditivas no que participa o Concello de Barro desde o ano 2013 con outros concellos da contorna, Cuntis, Campo Lameiro, Moraña e Portas, a través dun Convenio de colaboración entre os mesmos e contando co cofinanciamento da Consellería de Sanidade (Dirección Xeral de Saúde Pública, Servizo de prevención das condutas aditivas).

Ao longo deste curso escolar 2024-2025 realizaranse no C.E.I.P Amor Ruibal e no I.E.S de Barro actividades e obradoiros de prevención das condutas aditivas destinados ao alumnado de 6ºEducación Infantil, Educación Primaria e Educación Secundaria Obrigatoria. Con eles, e seguindo a evidencia científica, traballaranse importantes factores de protección que reducen os riscos psicosociais na xuventude (hábitos saudables, habilidades sociais, habilidades de rexeitamento, autoestima, intelixencia emocional, etc.), ademais do traballo dos mitos e riscos asociados ao uso das novas tecnoloxías e ao consumo de tabaco, alcol e outras drogas.

Estas actividades reforzaranse ao longo do 2025 con obradoiros destinados ás familias e con campañas de información e sensibilización sobre condutas adictivas destinadas a poboación xeral. Fortalecendo deste xeito a aposta que desde o Concello de BARRO se realiza pola Promoción de hábitos saudables e a prevención das condutas adictivas entre a súa veciñanza, e en especial entre a xuventude.

Estanse executando as obras de asfaltado do vial paralelo á vía desde a estrada da Estación até Valbon, polo que estará cortada a circulación de vehículos e peóns mentres duren os traballos.

O alcalde recibiu á familia de Sara, unha veciña de Barro que no seu día foi intervida para realizarlle un implante coclear binaural, co obxectivo de combater un diagnóstico de hipoacusia profunda froito dunha infección conxénita.

Para a recuperación de Sara é imprescindible un tratamento logopédico, pero os seus familiares trasladan que o SERGAS lles cambia de logopeda cada poucos meses, polo que non hai un profesional que poida facer un tratamento e seguimento continuado das necesidades de Sara e da súa evolución, o que vai en detrimento dun maior avance na súa recuperación.

Abraldes trasladoulle o seu total apoio e solidariedade, agardando que Sara poida contar co mesmo/a logopeda de forma estable para que o seu tratamento sexa o máis efectivo posible, e tamén se comprometeu a trasladarlle ao Xerente da Área sanitaria de Pontevedra, José Flores Arias, esta demanda da familia de Sara.

O concello de Barro, en colaboración coa Cruz Vermella, pon en marcha unha nova edición do obradoiro de memoria interactiva, dirixido a persoas maiores de 65 anos.
Se queres inscribirte, ponte en contacto co Deprtamento de Servizos Sociais 986 711 002